[灌水] 八十年前后白相苏州“开销”的比较 （沪语） 苏州, 拙政园, 大洋, 昆山

老叟

阿拉爷（父亲）是1895年养（出生）格。老早子听阿拉爷讲，解放前头，正确格讲，应该是抗战前头，五块大洋是蛮值铜钿格。当然，伊格辰光用格是银洋钿，真金白银的银元。

   记得伊是迭能讲格：苏州两日游，从上海北火车站出发，两个人去苏州。伊格辰光格火车赛过现在格地铁，一路要停真如、南翔、黄渡、陆家浜、昆山、唯亭等交关站头，到子苏州歇客栈歇下来，休息一歇，耐末吃中饭，吃好子中饭呢坐三轮车白相拙政园、狮子林，白相到差勿多，到附近格观前街寻饭店吃夜饭，饭店勿推板格，一般终归是松鹤楼，乾隆四年开格。小菜也是勿错格：油爆虾、干丝、响油鳝丝、松鼠黄鱼……一瓶加饭酒。酒足饭饱回到客栈休息。

   第二天早浪，还是到观前街吃面，苏州格面比上海面馆里格面要好吃得多。里耐（苏州闲话）是两次加工格。生面下到大锅格开水里，面条几上几落，熟哉。耐末捞上来，再用原汁原味格汤水再笃一遍，比方讲闷肉面，就用闷肉格肉汁笃刚刚捞起来格面条，个落迭格面就入味哉。陆振兴格面是出名格，着实超过上海格沧浪亭。阿拉大阿哥最近还勒拉牵记苏州格虾爆鳝面呢。

   早浪厢白相虎丘，伊歇辰光一般勿大到天平山、灵岩山去格，路忒远哉。当时格交通勿像现在迭能便当，坐三轮车要坐煞宁来。苏州是格邪气古老格城市，历史有2500多年哉。虎丘里厢有个剑池，一块大石头浪有一条缝，顶多三分之一支香烟迭能阔，据说是当年格干将呢，勿晓得还是莫邪格宝剑斩出来格，网浪厢讲，哥只是个传说，虎丘迭格说法也许也只是格传说。寻勿着文字记载。

   中浪厢呢，到木渎的白家饭店用餐。白家饭店也是百年老店，清朝皇帝格辰光开格。最有名气个小菜是鲃肺汤，迭只菜确实是用鲃鱼格肺做出来格，迭只汤色味勿推板，山青水绿，几只鲃肺，面浪飘格是青菜菜心，说是清火补肺格，中国人作兴吃啥补啥，勿奇怪格。迭家饭店还有一只红烧方肉，十公分见方，要切开来吃，颜色红得来漂亮得勿得了，伊歇辰光勿可能用色素或者添加剂格。一口咬下去，的的刮刮肥而不腻，吃勿脱末打包，回到上海第二天蒸一蒸，味道还是蛮斩格。笔者最近还 去尝过，牌子店家，确实有道理格。

   回到观前街，眼板要买眼苏州土特产。比方讲，苏州豆腐干、粽子糖、虾子鲞鱼……苏州多甜食，食品名店稻香村、采芝斋、老大房基本集中勒拉观前街浪厢。观前街实际浪只有几百公尺长，迭头走到伊头用勿脱十几分钟。

   接下来呢要赶火车哉。伊歇辰光格火车从苏州到上海要两三个钟头。下半日格火车到上海北火车站差勿多也要夜快边了。回到屋里吃夜饭正好。带转来格吃格物事老老小小一道享受，皆大欢喜。

   阿拉爷讲，上头讲格消费，包括来去火车票铜钿、白相苏州园林、歇客栈一夜、饭店小菜老酒、三轮车钿，包括带回来格苏州土特产。夯不浪当五块大洋，还有找头……

   80年之后格现在，假使还是迭能白相苏州，阿拉可以算算看：

         两人来回坐高铁：                    4X41=164元

         一夜标准间（莫泰168）：                 168元

         三顿正餐（含酒水，平均）    3X150=450元

         一顿早餐：                                          30元

         园林门票：                            2X160=320元

         出租车费：（包括上海出租车）        150元

         土特产开支：                                    180元

         合计 ：                                           1462元

   迭能一算，潇洒走一回苏州，80年前头格一块洋钿差勿多相当于现在格300元人民币，当然，现在坐格是出租车搭子高铁火车，其他唔没啥区别。

牛肉面

现在大变样