|
  
|
1#
发表于 2013-1-21 08:54
| 只看该作者
文豪鲁迅是主张“方言入文”个，伊曾经讲过：“方言土语里，很有些意味深长的话，我们那里叫‘炼话’，用起来是很有意思的，恰如文言的用古典，听者也觉得趣味津津。”所以，鲁迅个作品当中，就老多用到迭种“意味深长”个方言。
鲁迅是浙江绍兴人，使用最多个方言当然第一要推“绍兴闲话”，名列第二末，就是阿拉上海闲话了，特别是1927年鲁迅住到上海以后，由于身临其境，耳濡目染，上海闲话拉伊后期个主要文学创作——杂文当中频频出现。据有关专家统计，鲁迅杂文当中明显个上海闲话，勿包括重复个，就有一百多个地方。单单拿标题来讲，就有《抄靶子》、《吃白相饭》、《唐朝的钉梢》、《揩泪》、《寻开心》等八九篇文章。鲁迅先生是阿拉民族个语言大师，交关上海闲话一拨伊点化入篇，就好像天浪向个明星，闪烁出耀眼个光辉；好比绿地浪向个红花，显得老老醒目传神。
鲁迅杂文当中迭种能“增加文章的活气的”上海闲话，概括来讲主要有三个方面。首先是鲁迅杂文中个上海话能折射出旧上海个社会世象。鲁迅垃拉《准风月谈·爬和撞》中讲：“爬是自古有之，例如从童生到状元，从小瘪三到康白度。撞却似乎是近代的发明。”一个“爬”字，邪气生动个写出旧社会当中老多人挣扎向上“爬”个世象，迭个当中鲁迅连用两个上海闲话“小瘪三”与“康白度”，更加是点睛之笔。
侬看，据《简明吴方言词典》讲，“瘪三”是旧上海称城市中无正当职业而以乞讨或者偷窃为生个游民。一个“瘪”字，形容伊枯干精瘦；一个“小”字，说明伊年少瘦弱。“小瘪三”是旧上海个产物，而“康白度”就是大腹便便个“买办”。迭个侪是十里洋场上海滩个特产。所以，“从小瘪三到康白度”实在是旧上海“向上爬”个邪气形象个概括。其他，又比方称投靠地痞流氓头子叫“拜老头子”，把流氓制造事端诈取财物个卑劣行径称“折梢”，对被外国人脚踢叫作“吃外国火腿”咾啥，迭种上海闲话，侪被鲁迅随手拈来，写到杂文当中。
再有鲁迅杂文中个上海闲话带有浓重个感情色彩，有力个表达出作者个拳拳赤子之情。鲁迅垃拉《南腔北调集·为了忘却的纪念》中，谈到左联烈士殷夫个辰光，提到伊曾经带了一本“一个美国的新闻记者所做的中国游记”送拨殷夫，后来殷夫被捕，迭本书没收脱，“落拉‘三道头之类’的手里了”。“三道头”是指旧上海租界浪个巡官，因为制服臂章浪向有三条横纹标记而得名，鲁迅随手用了迭个富有上海地方色彩个词语，表示了伊对“三道头之类”个蔑视搭憎恨，也表达了对革命烈士个深深怀念。
又比方垃拉《南腔北调集·作文秘诀》中，用上海闲话“肉麻当有趣”，揭露了当时刊物浪向“父子作家”、“夫妇作者”，密授“作文密诀”个令人作呕个闹剧。垃拉《伪自由书·文学上的折扣》中，用上海闲话“像煞有介事”，来讽刺上海滩上有些文人装模作样，假正经个伪善面目等等。
还有鲁迅杂文中的上海闲话能使文章更加生动、形象，富有幽默感。1931年，军阀何键向国民党第四次代表大会提议：“中小课程应增设公民科，以保持民族固有道德而拯已溺之人心。”鲁迅作歌谣讽刺：“但愿诸公勿性急，让我来编教科书，做个公民实在勿容易，大家切莫耶耶乎……公民义务多得很，只有大人自己心里慌，但愿诸公切勿死守我的教科书，免得大人一不高兴便说阿拉是反动。”(《集外集拾遗·公民科歌》）迭里伊连用好几句上海话：“勿性急”（不着急）“勿容易”(不容易)、“耶耶乎”(马马虎虎)、“阿拉”(我)，不但通俗上口，增加了歌谣本色，而且生动传神，具有嘻笑怒骂个功效。
其他像称自杀为“跳黄浦”，吵架为“相骂”，傻子为“阿木林”、“曲辫子”、“寿头码子”等，迭点挂拉上海人嘴巴浪向个闲话，一拨鲁迅用进杂文当中，侪能唤起人们浓重个乡土意识，细细读来别有一番情趣。 |
|
