上海人看出来个颜色
据说，世界浪向各地个人对于颜色个看法各有千秋，对伊拉个归类也是勿一样个。因为太阳光照出来个颜色是连续个，像从一条虹里向，阿拉可以看到各种颜色，从红颜色一直到紫颜色，各种颜色一路排下来，里向是呒没边界线个。各地个人，由于使用个语言勿同，也会影响到分出颜色个种类勿一样，对某种颜色个看法勿一样。乃末，上海人个眼光里向看出来个颜色，也就用上海话个词语定下来了。阿拉小辰光有个童谣，叫“红黄蓝白黑，橘子柠檬咖啡色”。除了“红黄蓝”三原色脱仔“白、黑”以外，后头一句侪是用吃个物事定颜色个，交关具体咾生动。上海人从来勿讲“赭石色”，而叫“咖啡色”，搿个是大家熟悉咖啡个缘故。
上海人的眼光，是比较厉害个，会得深度分析颜色，形容起来也邪气出色，比喻用得蛮有情趣个。譬如连“铁锈”个颜色也用来命名，有一种色彩叫“铁锈红”。搿个颜色，真是用其他词语形容勿出个，而一用“铁锈红”搿个名称，大家邪气清爽，是像铁锈一样个红颜色，一种比较淡个咖啡色带有红色，中老年妇女蛮欢喜着搿种颜色个衣裳。
像“胭脂红”“皮蛋青”、“象牙白”、“蟹壳青”、、“皮蛋青”、“血牙红”、“玫瑰红”、“生姜红”、“西洋红”、“豆青”、“杏黄”、“姜黄”、“米红”、“月白”、“奶白”、“花青”、“青莲”，还有“豆沙色”、“古铜色”、“米色”咾啥，侪是有具体个物事摆辣旁边，搿个颜色词讲个颜色也就邪气明白了。而且分得特别细，像“皮蛋青”就是脱“蟹壳青”青得勿一样。
上海男人辣困难时期着藏青脱仔灰裤子浪也要翻翻行头，除了“铁灰”、“银灰”、“中灰”等，还有一种灰叫“香烟灰”，像香烟缸里个香烟灰搿能个颜色，侬讲好看勿好看？
对绿颜色，上海人个区分更加精细了，除了“草绿”、“墨绿”、“碧绿”咾啥，有一种叫“咸菜绿”，是像咸菜浪向个搿种绿颜色；一种叫“鹦哥绿”，是鹦哥身浪个比较亮个翠绿色；还有“秋香绿”，是秋天成熟后开始发黄个稻杆浪向个绿色。另外，“鸭头绿”、“黄胖绿”、“橄榄绿”、“苹果绿”、“葱绿”、“湖绿”、“水绿”……绿颜色分得介细，由此看来，上海真是一个生气蓬勃个城市。
搿些名称，侪是从“橘子柠檬咖啡色”的思路浪向来个，像搿能细腻个脱颜色取名字，上海闲话是一只鼎了。上海人取起颜色个名称来，是老轻松个，拿一样物事放上去就可以了。看是随意，实是深刻。连“拨侬点颜色（厉害）看看”搿能介个硬闲话，上海人也会得轻松幽默个甩出一句：“拨侬一盒彩色笔”！
页:
[1]