40年前国庆夜火车脱班（沪语）
40年前头个今朝，1972年个国庆节。笔者搭两个单位同事出差到上海个阿末一天，预买个车票就是十月一号夜里个火车，记得迭班火车个开车辰光是夜里七点半，一道出差个老同事，一个姓叶一个姓鲁，前头几天侪是买厂里用个量具、刃具、硬质合金刀头，还有产品浪用个电器、开关等等；公家个物事勿算多，倒是“私货”带仔勿勿少少：单单结婚个喜糖就是60斤，国庆日脚赶回去，就是要赶上人家结婚个大喜日脚；还有“飞马”牌、“劳动”牌、勿要凭票个香烟，一枪头就是三、四十条；两角六分一支个“庆丰”牙膏好几盒，一盒就是廿四根，介许多物事，侪是吃分量个，统统装进特大号个旅行袋，背上火车带回去…… 笔者是上海人，晓得国庆节夜里人民广场要放烟火，下半日4点钟开始就要交通管制，由斜桥上车个18路电车只好乘到西藏南路淮海东路。从淮海东路到天目东路北火车站，只好走路过去。为仔赶火车，为仔考虑到交通管制，搿日仔下半日5点钟，三个人辣辣阿拉屋里，马马虎虎个吃仔顿“夜饭”，就急出乌拉个乘18路电车出发了。电车到仔西藏南路“光明中学”门口，乘客统统下车，阿拉三家头只好背仔行李走路。事先唔没考虑到搿辰光西藏路浪已经是人山人海，侪是到人民广场去看烟火个，搿腔势真是“急煞老百姓”，到北火车站个最近路线，应该是沿牢西藏路，一直走到天目路右手转弯。但眼看潮水能介个人流，比世博会好好叫结棍个“轧闹猛”个上海人，西藏路根本是穿勿过去个，何况也勿让侬穿过去。问清爽仔交通管制的范围，按照负责管制人员个建议，从淮海东路朝小北门方向走，过老北门，由新开河到外滩，过外白渡桥绕到河南路，走到北火车站，整整绕仔一大圈。迭能介，辰光就觉着紧张了，看看手表已经是六点敲过，三个人肩抗手提仔六只“拍拍满”个旅行袋，开始“暴走”起来……唔没想着个是，国庆节个夜当，一路浪厢也侪是人流滚滚，还加介许多人侪是朝人民广场方向走个，阿拉个方向等于是“逆势而上”，一路浪勿断个左闪右躲，一勿当心旅行袋碰着人家，还要拨人家骂山门。好勿容易走到外滩（当年个外滩唔没泛光灯个夜景，国庆夜里个重头戏辣辣人民广场），三个人已经衣裳湿光，浑身个汗搭搭滴了……
迭个辰光已经是六点五十分，外滩白相个人也勿少。眼看距离开车只剩四十分钟，尽管搿行李个分量越来越重，三个人还是勿敢怠慢，相互鼓励一下闷仔个头，一步一步朝北火车站进发。搿辰光就赛过部队个负重“急行军”，火车是勿等人个。三个人拎仔每人勿少于20公斤个旅行袋，经过个游人侪是笃悠悠个踱四方步，只有阿拉三个人，拼仔个老命朝前冲，越走越“杀度（累）”，越走脚骨越酸痛。勿断个看手表浪个辰光，勿断个互相鼓励，啃仔啃仔经过了几只转弯，终于看到了北火车站大门，搿辰光已经是七点廿分，阿拉人还辣辣河南中路口头。
拼搏个辰光到了！三个人穿过天目东路，用足最后个吃奶力气，排除一切“干扰”，一路“冲刺”到侯车室。昏倒！阿拉要乘个75次快车已经停止检票！过脱真正一歇歇，隔了玻璃窗，三个人硬仔仔看牢仔迭班火车慢慢叫开出车站……一记头三个人侪瘫脱了！罪过八辣，那能办呢？只好寻北火车站个签票窗口，商量改签仔夜里十一点多钟个火车，辣辣火车站候车室里，无可奈何个等仔四个钟头，总算乘上了回浙江衢州个火车。搿桩事体因为发生辣国庆节个夜当，葛咾（所以）印象特别深刻，几十年里火车乘了无数趟，偏偏迭趟“吃素碰着月大”，拼仔老命赶还是眼看火车开脱，搿勿要忒郁闷哦！40年眼睛一霎过去了，叶、鲁两个老同事，每趟讲起当年国庆节火车脱班，赛过还辣辣眼面前……
页:
[1]