“头颈绝细，独想触祭”（沪语）
“头颈绝细，独想触祭”是一句“促里促掐”个上海闲话，乃“极形极状”、“极出乌拉”个吃相，活龙活现、“活脱势像”个讲子出来。迭句闲话，辣拉老早子，常状（经常）听得着个，屋里厢比较苦个人家，难板有点好个物事、好个小菜，几个小出佬赛过前世唔没吃过歇，肚皮里格馋涝虫侪爬子出来，极吼拉吼、侬抢我夺，“眼睛像霍袭（闪电），筷子像雨点”，大人还唔没吃着多少，侪拨拉小人吃个精打光。想想伊歇辰光也真是罪过八辣，兄弟姐妹多，屋里负担重，平常唔啥吃，阿勿怪迭帮小出佬。 “头颈绝细，独想触祭”个促掐就促掐辣“独想触祭”个人“头颈绝细”。老早子大块头勿多，生活困难个人家勿可能养出大块头，勿像现在有介许多“胖墩”，大多数小囡侪比较瘦，比方讲我自家，6岁读一年级个辰光，身高勿高勿低只有100公分，体重只有30斤，是市斤勿是公斤。读到高三，18个虚岁，身高长到166公分，体重还只有92斤，排（瘦）得勿得了。人瘦，头颈眼板细；头颈细了，嘴巴稍微馋一点，个没就是“独想触祭”了。我自家小个辰光，“独想触祭”糖果甜食，乃好好叫个一口牙齿侪吃蛀脱，退休之后只好去种子八只假牙齿。“头颈绝细，独想触祭”迭句上海闲话，绝对形象，绝对促掐。到子下头一代，阿拉两个小姑娘（女儿）迭个一代，记得辣拉大小姑娘十几岁个辰光，正好辣拉长发头里，夜里十点多钟，阿拉还唔没睏着，只听见厨房间里开关冰箱个声音，老婆搭我讲，一定是小姑娘开冰箱寻物事吃了，我讲伊拉做功课捱（晚）了，肚皮饿了，让伊拉去。有场状（时候）搭老婆寻开心讲：“侬肚皮里有伊个辰光，唔啥吃，个落小姑娘嘴巴馋呀！”。
最发噱个故事讲拨大家听：有一年秋天，浙江朋友送了勿少栗子，一时头浪吃勿脱，放辣竹匾里摊开，搁辣阳台浪，慢慢叫乃伊朗（晾）干。过脱子一段辰光，突然发觉栗子少脱子交关，阿拉两家头想来想去想勿通：假使拨老虫（老鼠）吃脱呢，总归有栗子壳留下来，奇怪个是竹匾里唔没栗子壳，各笃落处侪唔没栗子壳；假使是黄鼠狼，阿拉登（住）个是五楼，从来唔没听到工房里有黄鼠狼，再讲黄鼠狼也总归有响动；栗子勿断辣拉减少，有一趟吃饭个辰光，阿拉勿晓得那能会讲起迭桩事体，边浪个大小姑娘熬勿牢笑了起来，伊迭个一笑笑“刮三”了，结果伊承认是伊偷吃了栗子，还讲半干燥个生栗子老好吃个。——“独想触祭”到迭种程度，急煞人！大小姑娘搭阿妹介绍个经验是啥：“偷吃物事，勿好留下痕迹。”，厥倒！
到子再下头一代，两个外孙迭个一代。大个外孙呢，从小大概忒有得吃了，特别挑食。伊迭个挑食倒勿是挑精拣肥，而是盯牢几样小菜吃，比方讲冷拌黄瓜，比方讲臭豆腐干，比方讲红烧带鱼，比方讲番茄炒蛋。真正到子饭店里倒反而唔啥吃了，旧年（去年）开始住读初中预备班，外婆生怕伊营养勿够，每个礼拜三，总归要炒两、三只伊欢喜吃个小菜，乃保温桶摆好，调两部车子送到学堂里去。小个外孙呢勿对了，怕怕（按说）平常也有得吃个，四个足岁个“小鬼”，身高已经超过110公分，体重毛毛叫50斤，伊就比较馋涝，只要看见啥人辣拉吃物事，一就会用手指头，正宗个食指，指指自家张开个小嘴巴，意思是伊也想吃。迭个小囡只好讲伊是“头颈勿细，也想触祭”了。
“头颈绝细，独想触祭”，现在好像勿大听得到了，吃已经勿是问题，问题恐怕是进去容易出来难。“触祭”得多了，“任之乌之”个吃，小人吃出个“胖墩”，大人吃出个“三高”，乃末来勿及了。
页:
[1]